Nirere Madeleine, Perezida wa Komisiyo y’Igihugu y’Uburenganzira bwa muntu arahamagarira abantu cyane cyane urubyiruko kwirinda icuruzwa ry’abantu.

Agira ati “Hari abantu bashukwa, bakababeshya akazi keza, bakababeshya ko bagiye gukira, aha ngaha tugomba kugira amakenga ukibaza uti uyu muntu unjyanye, inyungu aba afite ni iyihe?”

Asaba urubyiruko kwirinda ibishuko kuko umuntu aba agomba kubona ibyo yavunikiye.

Ati “Tugomba kuruha kugira ngo tubone icyo twavunikiye, ikintu utavunikiye uge ukigiraho amakenga, uge ubyibazaho, kujyana umwana w’umukobwa cyangwa umwana w’umuhungu hari abo bakoresha imirimo y’agahato, ugasanga umwana agarutse yarabaye igisenzegeri, abakobwa bakabafata ku ngufu bakabakoresha imibonano mpuzabitsina y’urukozasoni, bakabakinisha amafirimi y’urukozasoni, ugasanga umuntu ntagifite ubuzima ari ubw’umubiri cyangwa ubwo mu mutwe.”

Abasaba ko bagomba kumenya ko ibyo byaha bihari, gutanga amakuru ku gihe mu nzego zegereye abaturage, mu midugudu, mu tugari n’ahandi kandi ngo hari nimero itishyurwa bashobora guhamagaraho.

Uretse ibyo asaba ko umwe yaba ijisho rya mugenzi we bagacungirana umutekano.

Asaba abantu kwirinda amakimbirane mu miryango niba bashaka kubaka igihugu kiza, asaba kwimakaza, kuganira mu miryango, bimakaze gushakira umwanya abana babo, kandi buri umwe wese agahangayikishwa n’umwana w’umuturanyi nkaho ari uwe.

Byongeye kandi avuga ko hari ingamba mu gukumira ibi byaha.

Ati “Ingamba zihari nk’urwego rw’ubutabera rushinzwe gukurikirana politiki y’ubutabera mu gihugu, imiyoborere myiza, ubutabera kuri bose, kubaka igihugu kigendera ku mategeko ni ngombwa yuko ibyo byaha bibangamira umutekano w’abaturage birwanywa, turakangurira abaturage gutanga amakuru ku gihe, kumenya ububi bw’ibyo byaha uburyo bikorwamo, kubyirinda cyane cyane hagamijwe kubaka igihugu kiza gifite urubyiruko rufite ubuzima bwiza.”

Icuruzwa ry’abantu risobanurwa mu gitabo cy’urwunge rw’amategeko mpanabyaha giherutse gushyirwa ahagaragara, itegeko rifite nimero 51 /2018 ryasohotse mu igazeti ya leta 24/9/2018 mu ngingo yaryo ya gatatu, agace ka 6 icyaha k’icuruzwa ry’abantu ni igikorwa cyose gikozwe n’umuntu hagamijwe gushaka inyungu, uyu muntu yaba aha cyangwa ashakira akazi undi, amutwara, amwimura, ahisha cyangwa se yakira uwo muntu hakoreshejwe ibikangisho, imbaraga n’ubundi buryo bwose bw’agahato cyangwa se ishimuta hakoreshejwe se uburiganya, ubushukanyi, kumubonerana kubera ububasha amufiteho cyangwa kubera ko umuntu ari umunyantege nke, hashobora kandi gutanga cyangwa kwakira ubwishyu cyangwa inyishyu kugira ngo uyu muntu bafiteho ububasha abe yacuruzwa cyangwa se yemere gucuruzwa.

Uburyo bwa kabiri iki cyaha gisobanurwa ni ingingo ivuga ko ari igikorwa gikozwe n’umuntu wese uha akazi, utwara, wimura, ucumbikira cyangwa se wakira umwana hagamijwe kumushakamo inyungu.

Musubize