Ubuyobozi bw’ikipe ya AS Kigali buremeza ko bugiye kwishyura amadeni bwari bufitiye abakinnyi batanu bahoze bayikinira nyuma bakayivamo badahawe amafaranga yo kubagura  ndetse  n’imishahara yabo.

Uyu mwenda iyi kipe y’Umujyi wa Kigali  yagiyemo aba bakinnyi muri  2016, ubwo yatindaga kubaha amafaranga yo kubagura, maze bamwe bakaza gutandukana nayo batayabonye kandi bari bayemerewe basinya amasezerano.

Abakinnyi 5 ari bo Kubwimana Cedrick, Ndaaka Frederick, Sebanani Emmanuel Crespo, Kabura Muhammed na Ndayishimiye Yussuf Kabishi   bifashije umunyamategeko bareze   ikipe ya AS Kigali  ko itubahirije ibyo yabemereye mu masezerano basinye.

Muri 2017 nyuma yo kwitabaza komisiyo yo gukemura amakimbirane mu ishyirahamwe ry’umupira w’amaguru mu Rwanda “FERWAFA”  yaje   kwanzura  ko  AS Kigali igomba kwishyura aba bakinnyi  amafaranga yabo.  Tariki 17 Ukuboza 2018  iyi kipe ya AS Kigali yajuririye iki kemezo  ariko Komiyo yanzura  ko ubujurire bwa AS Kigali budafite ishingiro kandi ko butigeze bwubahiriza amategeko bongera gusaba ko yishyura aba bakinnyi.

Umwe muri aba bakinnyi yatangarije Imvaho Nshya ko kugeza n’uyu munsi bagitegereje amafaranga yabo. Uyu mukinnyi anemeza ko bose uko ari batanu bagombaga guhabwa amafaranga agera kuri miliyoni 25 arimo amafaranga bagombaga kugurwa “Frais de recrutement”, imishahara yabo ushyizeho n’indishyi z’akababaro.

Umunyamabanga mukuru wa FERWAFA, Uwayezu François  Regis yabwiye Imvaho Nshya ko barimo gukorana na AS Kigali kugira ngo yishyure amafaranga y’aba bakinyi

Ati: ”Urabona muri AS Kigali harimo ibyagiye bihinduka ku ruhande rwabo  rw’ubuyobozi. Ubu turimo gushaka uko ikibazo cyakemuka. Twabivuganye n’ubuyobozi kandi bemera ko mu gihe cya vuba hazaba hagaragaye umurongo nyawo ikibazo kigakemuka.”

Ku ruhande rw’ikipe ya AS Kigali, Komusenge Dan, umunyamabanga mukuru mushya w’iyi kipe  na we yemera ko bagishaka ubushobozi bwo kwishyura aba bakinnyi ariko bizakunda mu gihe cya vuba cyane ko ari ikemezo cya FERWAFA.

Ati: ”Tugomba kubishyura byanze bikunze  kuko tubafitiye umwenda , ubwo twe tugomba  gushyira mu bikorwa iriya myanzuro kandi vuba. Igisigaye ni ugushaka ubushobozi tukishyura. Nta bwo erega twanze kubishyura ni ikibazo cy’ubushobozi butabonekeye igihe kugeza ubwo amasezerano arangira, ubushobozi bukomeza kubura, habaho kuba batujyana mu rubanza.”

N’ubwo aba bakinnyi bavuga ko bazishyurwa agera kuri miliyoni 25, muri AS Kigali bo batangaza ko umwenda bafitiye aba bakinnyi ari miliyoni 9.

Aba bakinnyi bikaba bivugwa ko amafaranga yabo yari yasohokanye hamwe n’ay’abandi bagumye muri iyi kipe muri 2017 ntibayahabwa. Ibi bivuze ko  Umujyi wa Kigali ari nawo utera inkunga iyi kipe  watanze amafaranga ariko ntahabwe aba bakinnyi.

Musubize