Aya makuru aravugwa mu Mudugudu wa Kamabuye, Akagari ka Cubi, Umurenge wa Kayenzi, mu Karere ka Kamonyi, aho umwana ngo yagiye kwica inzoka ikabanza kumuvugisha, ubwo yari amaze kuyica ahita agira ikibazo cyo mu mutwe.

Nubwo abaturage batangaza amakuru ku buryo butandukanye, bamwe bavuga ko uwo mwana yari amaze kwica inzoka agira icyo abazwa n’igikeri, ngo kigira kiti “Ese shahu ko wishe sobuja uzaheruka nde?

Undi ati “Yatemaga igiti giturumbukamo inzoka iramubwira iti ‘ugiye kwica umukurambere”.

Bamwe mu baturage bavuga ko batanu bo mu muryango umwe bahise bagira ikibazo cyo mu mutwe, abandi bakavuga batandatu, mu gihe umunyamabanga Nshingwabikorwa w’umurenge wa Kayenzi, Mandela Innocent, avuga ko abo yabwiwe ari batatu.

Ati “[Abanza guseka] amakuru y’inzoka twebwe ntabwo tuyazi, nk’ubuyobozi twamenye ko abantu bafite ikibazo tujyayo bari mu bintu by’amasengesho, tubavanayo tubazana ku kigo nderabuzima, nacyo biba ngombwa ko kibohereza ku bitaro bya Remera/Rukoma, n’ubu niho bari”.

Musubize