Urubanza rw’Umunyamakuru Mugabe Robert, kuri uyu wa Kabiri rwakomereje mu Rukiko rw’Ibanze rwa Kagarama, ubushinjacyaha busaba ko uregwa afatwa ibindi bizamini bya ADN, kugira ngo burangize iperereza.

Mugabe ashinjwa gusambanya abakobwa babiri bavukana, umwe w’imyaka 19 akamutera inda nyuma amushakira imiti yo kuyikuramo, anasambanya murumuna we w’imyaka 17 y’amavuko.

Mugabe yatawe muri yombi muri Nzeri 2018 ariko aza gufungurwa by’agateganyo n’icyemezo cy’Urukiko rw’ibanze rwa Kagarama mu Ukwakira 2018. Iki cyemezo cyaje kujuririrwa mu Rukiko rwisumbuye rwa Nyarugenge mu Ugushyingo rutegeka ko agomba kuburana afunzwe by’agateganyo.

Muri Gashyantare 2019 Urukiko rw’Ibanze rwa Kagarama rwanzuye ko yongererwa igiye cyo gufungwa by’agateganyo, ahita ajurira mu Rukiko Rwisumbuye rwa Nyarugenge rutesha agaciro ubusabe bwe ku wa 1 Mata akomeza gufungwa.

Mu gitondo cyo kuri uyu wa 23 Mata 2019, nibwo Mugabe wari kumwe n’umwunganira, Me Uwamahoro Marie Josée, bitabye Urukiko rw’Ibanze rwa Kagarama baburana ku ifungwa n’ifungurwa ku yindi minsi 30 y’agateganyo.

Ubushinjacyaha bwari buhagarariwe na Habimana Kabin wabwiye urukiko ko ubwa mbere basabye urukiko guha umwanya ubushinjacyaha bugakora iperereza ndetse rwumvise ubwo busabe.

Yakomeje avuga ko “Dusaba ko yongererwa iminsi y’igifungo cy’agateganyo twagaragaje impamvu ariko icy’ingenzi ni uko twagombaga kumufata ibindi bizamini bya ADN, hari ibyo twagombaga gupimisha hano mu Rwanda ndetse ibindi tukabijyana mu Budage.”

“Icyo gihe twasobanuye ko Mugabe twamuhamagaye kugira ngo tumujyane mu bitaro n’uwo mwana wahohotewe tubafate ibizamini bya ADN ariko Mugabe yanze kuza avuga ko atava muri gereza ngo aze gufata ibizamini.”

Habimana yashimangiye ko asaba urukiko mu bushishozi bwarwo gutegeka ko Mugabe afungwa ukundi kwezi ndetse akanategekwa ko yaza akipimisha kugira ngo iperereza rirangire ndetse abe anafashije ubutabera kwihutisha urubanza.

Yavuze kandi ko Mugabe akekwaho icyaha cy’ubugome cyo gusambanya umwana ku ngufu kandi n’itegeko riteganya ko ashobora gufungwa by’agateganyo kugeza ku gihe cy’umwaka.

Mugabe uhakana yivuye inyuma ibyaha ashinjwa byo gusambanya abana yavuze ko “ari ibitwererano”. Yabwiye urukiko ko rwategeka ko ubushinjacyaha bumwereka ibisubizo byavuye mu bizamini bya ADN yafashwe bwa mbere kugira ngo nawe abone kwemera ko yafatwa ibindi.

Yakomeje asobanura ko ubwa mbere ubushinjacyaha bumuhamagaza mu biro byabwo butigeze bumubwira icyo bumuhamagariye ndetse yagezeyo bakamusaba kujya gufata ibizamini ndetse yabikoze ariko atumva impamvu yo gufatwa ibindi bizamini ataramenya ibyavuye mu bya mbere.

Yakomeje avuga ati “Simfite n’ikibazo mutegetse ko mbikoresha (ibindi bizamini bya ADN), ariko sinumva n’impamvu mwabitegeka ibyaha ndegwa nziko ari ibihimbano. Urumva gufasha ubushinjacyaha ku bimenyetso bashaka kugira ngo ngaragaze ko ndi umwere ndekurwe, ntabwo nabyanga ariko impungenge mfite ni gihamya inyemeza ko badashaka gukora iryo pima rya kabiri kugira ngo bampimbire icyaha.”

Me Uwamahoro wunganira Mugabe yashimangiye impungenge zagaragajwe n’umukiliya we avuga ko ababuranyi bagomba gufatwa kimwe, nk’uko ubushinjacyaha hari ibyo busaba urukiko ariko n’uregwa nawe afite ibyo asaba urukiko.

Yakomeje avuga ko icyaha aregwa ari icyaha gikomeye gishobora gutuma afungwa burundu ari yo mpamvu akwiye kubanza kwerekwa ibyavuye mu iperereza rya mbere.

Me Uwamahoro yasabye ko umukiriya we yarekurwa cyane ko na mbere yigeze kumara amezi abiri adafunzwe kandi ntiyigere atoroka ubutabera.

Asaba urukiko kandi ko mu bushobozi bwarwo rwategeka ko Mugabe atatanga ibizamini bya kabiri atabonye ibyavuye mu bya mbere.

Kuri iki cyo gutanga ibizamini, Umushinjacyaha yavuze ko bakiri mu iperereza kandi iperereza ari ibanga ndetse n’ibisubizo bizamurikirwa mu iburanisha mu mizi bityo nta shingiro Mugabe afite ryo gusaba ko yerekwa ibisubizo kandi iperereza rigikomeje.

Nyuma yo kumva impande zombi, Umucamanza wari uyoboye iburanisha yavuze ko umwanzuro w’urukiko uzasomwa ku wa 25 Mata 2019, Saa kumi z’umugoroba.

Musubize