Urukiko rw’Ubujurire muri Suède rwateye utwatsi ubujurire bw’umunyarwanda Rukeratabaro Théodore ufite ubwenegihugu bw’iki gihugu wari warakatiwe gufungwa burundu kubera uruhare rwe muri Jenoside yakorewe Abatutsi.

Muri Kamena 2018 nibwo Urukiko rwa Stockholm muri Suède, rwahamije Rukeratabaro uruhare muri Jenoside yakorewe Abatutsi mu 1994, rumuhanisha igifungo cya burundu.

Rukeratabaro ni Umunyarwanda w’imyaka 50 ufite ubwenegihugu bwa Suède ariko akaba yariyise Théodore Tabaro agamije kwihisha ubutabera.

Yahamijwe ibyaha by’ubwicanyi, gucura umugambi w’ubwicanyi ndetse no gushimuta Abatutsi byaje kubaviramo kwicwa.

Urukiko rwari rwavuze ko Rukeratabaro yagize uruhare mu bwicanyi bw’Abatutsi bari bahungiye ku mashuri no kwica Abatutsi ubwe abandi 19.

Nyuma yo kujuririra, Urukiko rw’ubujurire narwo rwahamije ko akomeza gufungwa burundu.

Bamwe mu batangabuhamya bazi Rukeratabaro mbere ya Jenoside ngo yari Umujandarume, akaba ashinjwa ko ibyo byaha by’ubwicanyi yabikoreye muri segiteri Winteko akomokamo, Nyakanyinya na Mibilizi ahari harahungiye Abatutsi benshi. Bavuga kandi ko yayoboye ibitero byishe abatutsi benshi.

Tariki ya 13 Mata 1994, yayoboye igitero giturutse ku Winteko cyagiye kwica Abatutsi bari bahungiye ku ishuri ribanza rya Nyakanyinya.

Iki gitero cyishe Abatutsi basaga ibihumbi bitatu, bicishwa amasasu, gerenade, imihoro n’amahiri ku buryo abagabo, abagore n’abana bari bahahungiye hafi ya bose bishwe.

Ubushinjacyaha Bukuru bw’u Rwanda bubinyujije kuri Twitter, bwashimye ubutabera bwa Suède, busaba ibindi bihugu gukurikiza uru rugero rwiza mu kuburanisha abakekwaho uruhare muri Jenoside.

Rukeratabaro wari ku rutonde rw’abashikishwa n’ubutabera bw’u Rwanda kubera uruhare rwe muri Jenoside, yageze muri Suède mu 1998 abona ubwenegihugu mu mwaka wa 2006.

Kuva mu 2014 Suède yakatiye abandi Banyarwanda babiri igifungo cya burundu kubera uruhare bagize muri Jenoside barimo Stanislas Mbanenande na Claver Berinkidi.

Musubize